SÒM CHWAZI

Se avèk anpil plezi

Nou prezante jounen jodi

Travay sa a ki fèt nan lespri

Pou ede piblik Ayisyen an jwi

Yon ti kal nan jan pèp Ebre a beni

Paske yo te ka li, yo te ka tande an pwezi

Bèl sòm sa yo Bondye te pèmèt pitit li yo ekri.

_______________________________

Nou pwofite okazyon sa a pou nou di mèsi

Ak tout moun ki te kontribye pou travay sa a reyisi:

Bondye, an premye, ki bay entèlijans, sajès ak lespri,

Pastè Desan Lilite, Papa nou, ki deja devanse nou nan lavi,

Tulia M. Lilite, manman nou, ki te pran tan aprann nou viv lavi,

Jodèle, madanm mwen, Ki konble m ak lanmou, pou m jwi lavi,

Tou le twa pitit fi mwen yo: Joska, Johana, Jodi ki te aksepte soufri

Paske anpil fwa yo te bezwen papa yo, msye te chita nan biwo ap ekri.

Jeanne Pierre, Azer Lilite, Obedda Alexis, Magda Bonny, Louima Lilite, mèsi

Se frè ak sè Bondye ban nou ak fanmi yo. Nan vi nou, yo te fasilite sajès blayi.

Tout frè ak sè Legliz Ayisyen Lagras nan chicago, tout Maranaten, maranatèn, Mèsi.

 

  “SÒM CHWAZI ” se yon konpilasyon 30 Sòm prezante an Pwezi nan lang Ayisyen natif natal. 29 nan Sòm sa yo soti nan Bib la. Gen yon Sòm nou rele Sòm Zero (0), Se Otè a ki konpoze l. Chwa sòm yo baze sou popilarite yo nan kominote kretyen Ayisyen an. Se yon premye egzemplè ki soti pandan dezyèm gwoup Sòm k apral fòme pwochen rekèy la rete sou fòm pwojè.

“SÒM CHWAZI ” pral atire lespri ak je moun paske mo yo chwazi avèk swen pou sòm yo ka rete mezi fidèl yo kapab ak mesaj tèks ki nan Bib la, men anmenm tan tou, pou yo briye pa mwayen yon chema ki ka ede moun sonje pi byen ki sòm ki ki sòm.

“SÒM CHWAZI ” se yon travay ki gen yon gwo valè pou literati lang Ayisyen an. Moun ka itilize l pou ede fè analiz literati, pou sipòte aprantisaj lekti, pou ede moun pale yon kreyòl ki koulan, epi pou fè pèp Ayisyen kenbe fyète yo sou kesyon lang Kreyòl, paske lang Kreyòl Ayisyen an se yon lang total kapital tankou nenpòt ki lòt lang li ye.

“SÒM CHWAZI ” se yon rekèy ki pral pouse plis Ayisyen renmen lang yo a. Lè sa a, y ap vini pi alèz chak jou pou yo lanse kò yo nan devlopman ekri tèks Kreyòl nan yon estil ki klè, ki pa konplike, men anmenm tan tou, ki bèl.

“SÒM CHWAZI ” ka sèvi nan plizyè domèn: Devosyon pèsonèl, Lekti nan Asanble legliz, Aprann timoun lekòl li avèk aksan, ak ponktyasyon, Aprann granmoun nan kou alfabetizayon li byen, epi Sèvi Sipò pou etidyan nan inivèsite k ap pran kou sou zafè pale an piblik.

“SÒM CHWAZI ” vini ansanm ak yon gwo bonis. Se yon bèl pwezi ki fèt avèk lapriyè n ap resite tout tan an, epi ki rele, “Papa Nou” ou byen “Orezon Dominical”. Lapriyè a prezante sou fòm yon flèch moute, paske se lapriyè n ap voye moute bay Papa Bondye nou an jan Mèt nou, Sovè nou, Jezi te aprann disip yo pou yo priye a.

“SÒM CHWAZI” nan pla men w! Ou kapab fè l tounen yon fontèn resous pou devlopman lavi espirityèl, entèlektyèl, sosyal, atistik, literè, kiltirèl, lengistik, ets… Ou kapab lage l tou nan depotwa, kite richès sa a gaspiye byen gaspiye. W a deside! Mèsi anpil.

Sòm 0

Bay Bondye Benediksyon!

Se yon sòm Pastè Jean Osée Lilite ekri

Pou mande moun pou yo louwe non Bondye.

Twofe Bondye Se Benediksyon Ki soti Nan bouch nou.

Sòm sa se yon travay ki fèt ak ladrès. Tout mo ki fòme Sòm sa a kòmanse avèk lèt “B” Li  se yon envitasyon pou bouch bave benediksyon sou Bondye paske Bondye merite pou nou beni non Li. Se pou Sòm sa a beni nanm nou tout!

Bouch!

Beni Bondye!

Bave Benediksyon!

Bay Bondye Benediksyon!

Blende bòl Bondye byen blende,

Blende bokit Bondye byen blende;

Bimen, byen badijonnen bab Bondye;

Bade, bonmen, boure biskèt Bondye;

Bwat, bokit, barik, bal benediksyon!

Byeneme Bondye bay bon basinay,

Bay Bondye bonkou benediksyon!

Bay Bondye barik benediksyon!

Brav, balanse bra bay Bondye!

Banbile, Banbile bay Bondye

 Bay Bondye benediksyon!

Bouch, bobo Bondye!

Bobo L byen bobo!

Bave benediksyon!

Badijonnen bab Bondye,

Bondye bezwen benediksyon;

Bay, bay Bondye benediksyon!

Blende benediksyon bay Bondye

Bondye batay bat betizè byen bat,

Bonte Bondye balize bitasyon w

Byenfè Bondye brize barikad

Bay Bondye benediksyon!

Byeneme Bondye Beni,

Bay Bondye benediksyon!

Bondye bay bonbon,

Bay Bondye benediksyon!

Bondye bay bravou

Bay Bondye benediksyon!

Bondye bare baton,

Bay Bondye benediksyon!

Bondye beni bag;

Bay Bondye benediksyon!

Bondye bay byen

Bay Bondye benediksyon!

Bondye Bon;

Bay Bondye benediksyon!

Bay Bondye benediksyon!